Friday, January 30, 2009

മെഗാസ്റ്റാര്‍ വെര്‍സെസ്സ് സൂപ്പര്‍സ്റ്റാര്‍ അഥവാ ഇക്ക വെര്‍സെസ്സ് ഏട്ടന്‍

മലയാള ചലച്ചിത്ര പ്രേമികള്‍ക്ക് ഒരു അപൂര്‍വ സമ്മാനവുമായാണ് കേരളത്തിലെ ഏറ്റവും പ്രചാരമുള്ള സിനിമാ വാരികയായ തമോഗര്‍ത്തത്തിന്റെ ഈ ലക്കം നിങ്ങളുടെ മുന്നിലെത്തുന്നത്. മുപ്പതിലേറെ വര്‍ഷങ്ങളായി മലയാള സിനിമയുടെ നെടുന്തൂണുകള്‍ എന്ന് തന്നെ പറയാവുന്ന രണ്ട് മഹാപ്രതിഭകളാണ് കോട്ടയം സ്വദേശിയായ ഇക്കയെന്ന് സ്നേഹമുള്ളവര്‍ വിളിക്കുന്ന മെഗാ സൂപ്പര്‍സ്റ്റാര്‍ എ കെയും , തിരുവനന്തപുരം സ്വദേശിയായ , ആരാധകര്‍ ഏട്ടന്‍ എന്ന് വിളിക്കുന്ന സൂപ്പര്‍ മെഗാസ്റ്റാര്‍ എ കെ യും. മലയാള സിനിമയിലെ ഈ താര രാജാക്കന്മാര്‍ ഒന്നിക്കുന്ന പ്രത്യേക അഭിമുഖം തമോഗര്‍ത്തത്തില്‍ നിങ്ങള്‍ക്കായി: (അഭിമുഖം ചെയുന്നത് എ കെയല്ലാതെ പിന്നെയാര് ???)


എ കെ വെര്‍സെസ്സ് എ കെ

എ കെ : "നിങ്ങള്‍ രണ്ടാളെയും ഒന്നിച്ച് അഭിമുഖം ചെയ്യുവാന്‍ സാധിച്ചത് എന്‍റെ ജീവിതത്തിലെ ഒരു അസുലഭ അവസരമായി ഞാന്‍ കരുതുന്നു. "
ഇക്ക : "ഞങ്ങളും അങ്ങിനെ തന്നെ "
എ കെ : "നിങ്ങള്‍ക്കും...???"
ഏട്ടന്‍ : "ഞങ്ങള്‍ക്കല്ല....ഞങ്ങളെ ഒരുമിച്ച് അഭിമുഖം ചെയ്യുന്നത് നിന്‍റെ ജീവിതത്തിലെ അസുലഭ അവസരം തന്നെയാണെന്ന് ഞങ്ങളും കരുതുന്നു എന്നാ ഇക്ക ഉദ്ദേശിച്ചത്"

എ കെ : " ഇന്ത്യ മുഴുവന്‍ അറിയപ്പെടുന്ന അഭിനയ പ്രതിഭകളായ നിങ്ങള്‍ തമ്മില്‍ ഏതെങ്കിലും തരത്തിലെ മത്സരം നിലനില്‍ക്കുന്നുണ്ടോ?"
ഇക്ക :"തീര്‍ച്ചയായും ഉണ്ട്. ഞങ്ങളെക്കാള്‍ എത്ര വയസിനിളപ്പമുള്ള പെണ്‍കുട്ടികളുടെ നായകന്മാരായി അഭിനയിക്കാം എന്ന കാര്യത്തില്‍ വാശിയേറിയ ഒരു മത്സരം തന്നെ ഞങ്ങള്‍ക്കിടയിലുണ്ട്‌. പക്ഷേ അക്കാര്യത്തില്‍ മിക്കപ്പോഴും ജയിക്കുന്നത് ഇവനാ . ഹോ, ചില സമയത്ത് ഇവന്‍റെയൊപ്പം മരം ചുറ്റിയോടുന്ന പെണ്ണുങ്ങളെക്കണ്ടാല്‍ സഹിക്കില്ല. "
ഏട്ടന്‍ : "മാത്രമല്ല, ഏറ്റവും കൂടുതല്‍ അന്യഭാഷാ നടിമാരെ അറ്റന്‍ഡ് ചെയ്യുക, ഛേ!!! ആക്റ്റ് ചെയ്യിപ്പിക്കുക എന്ന കാര്യത്തിലും ഞങ്ങള്‍ മത്സരിക്കാറുണ്ട്. അക്കാര്യത്തില്‍ പക്ഷെ ഇക്ക സ്ട്രോങ്ങാ.ഞാന്‍ അടുത്തെങ്ങും വരില്ല ."
എ കെ : "അല്ല ,അപ്പൊ അഭിനയത്തിന്റെ കാര്യത്തില്‍ നിങ്ങള്‍ തമ്മില്‍ മത്സരം ഇല്ലേ ?"
ഇക്ക : "അഭിനയമോ? എഴുന്നേറ്റു പോടാ അവിടുന്ന്,വൃത്തികേട്‌ പറയാതെ. ഞങ്ങള്‍ അങ്ങിനെയുള്ള തറ പരിപാടികള്‍ നിറുത്തിയിട്ട്‌ അഞ്ചാറ് കൊല്ലമായി "
ഏട്ടന്‍ : "അല്ലെങ്കില്‍ നീ തന്നെ പറ. കഴിഞ്ഞ അഞ്ച് കൊല്ലങ്ങള്‍ക്കിടയില്‍ പുറത്തു വന്ന ഞങ്ങളുടെ ഏത് ചിത്രത്തിലാ നീ 'അഭിനയം' കണ്ടത്?"

എ കെ : " ക്ഷമിക്കണം . അറിയാതെ ചോദിച്ച് പോയതാണ് . അടുത്ത ചോദ്യം. ഒരു ചിത്രം ചെയ്യാന്‍ തീരുമാനിക്കുമ്പോള്‍ എന്തൊക്കെ കാര്യങ്ങളാണ് നിങ്ങള്‍ പരിഗണിക്കുന്നത്.?"
ഇക്ക : "അടുത്തിടയെയായി എനിക്ക് നൃത്തം , കോമഡി തുടങ്ങിയവയുടെ എന്നെക്കൊണ്ട് മാത്രം സാധിക്കുന്ന വേരിയേഷന്‍സ് ചെയ്ത്, 'ഇതിന്റെ പേരും നൃത്തമെന്നോ ? ' , 'ഇതും കോമഡിയോ' ,എന്നിങ്ങനെയുള്ള അത്ഭുത രസങ്ങള്‍ പ്രേക്ഷകരില്‍ ഉളവാക്കാനുള്ള വകുപ്പുണ്ടോ എന്നാണു ഞാന്‍ ഒരു പ്രോജെക്റ്റ്‌ വരുമ്പോള്‍ പ്രധാനമായും നോക്കാറുള്ളത്. കൂടാതെ ചിത്രത്തില്‍ ഞാന്‍ ഇടുന്ന ഷര്‍ട്ടുകളിലെ പൂക്കളുടെ എണ്ണം, വലിപ്പം ,നിറം എന്നീ കാര്യങ്ങളും , കൂളിങ്ങ് ഗ്ലാസുകള്‍ എത്രയെണ്ണം എനിക്ക് ആ ചിത്രത്തില്‍ വെക്കുവാന്‍ സാധിക്കും എന്ന വസ്തുതയും , ഞാന്‍ പരിശോധിക്കാറുണ്ട് "
ഏട്ടന്‍ : "ഞാന്‍ കുറെക്കാലമായി ചിത്രത്തില്‍ എന്‍റെ നായിക, അനുജത്തി , അനുജത്തിയുടെ സുഹൃത്തുക്കള്‍, സഹോദര ഭാര്യ , അവരുടെ സുഹൃത്തുക്കള്‍ , അയലത്തുകാരി , അവരുടെ അനുജത്തി അങ്ങിനെ ആ ചിത്രത്തില്‍ അഭിനയിക്കുന്ന യുവനടികളുടെ പൂര്‍ണ്ണമായ ലിസ്റ്റ് കൈയില്‍ കിട്ടി ബോധിച്ചാലെ ഒരു പ്രോജെക്റ്റിന് സമ്മതം മൂളാറുള്ളു.കൂടാതെ ,'നിങ്ങള്‍ക്കൊന്നും അറിയില്ല . കാരണം നിങ്ങള്‍ കഴുതകളാണ് ' തുടങ്ങിയ പഞ്ച് ഡയലോഗുകള്‍ കാണികളെ നോക്കി സ്ക്രീനില്‍ പറയുവാനുള്ള സ്കോപ്പും ഞാന്‍ നോക്കാറുണ്ട്. "

എ കെ : "അപ്പൊ സംവിധായകനും, കഥയും , തിരക്കഥയും ഒക്കെ ?"
ഇക്ക : "ഇല്ല ,ഇവനിന്ന് വല്ലതും വാങ്ങിച്ചോണ്ടേ പോകു. എടാ ഇതൊക്കെ നോക്കാന്‍ ആര്‍ക്കു നേരം?"
ഏട്ടന്‍ : "മാത്രമല്ല, ഞങ്ങളുടെ ചിത്രങ്ങള്‍ ഏത് ചെറ്റ സംവിധാനം ചെയ്‌താല്‍ എന്ത്? അതിന്റെ കഥയും തിരക്കഥയും എന്തായാല്‍ എന്ത്? ഞങ്ങളുടെ മുഖങ്ങള്‍ പോസ്റ്ററില്‍ വന്നാല്‍ , ഒരു ഇരുപത്തിയഞ്ച് ദിവസം ഫാന്‍സ്‌ എന്ന മണ്ടന്മാരും, ഞങ്ങളുടെ പഴയ നല്ല ചിത്രങ്ങളുടെ ഹാങ്ങ്‌ഓവര്‍ മനസ്സില്‍ ബാക്കി സൂക്ഷിക്കുന്ന കുറെയധികം പൊട്ടന്മാരും ഇടിച്ച് കയറിക്കൊള്ളും."
ഇക്ക : "എ , ബി ,സി വ്യതാസമില്ലാതെ സാധിക്കുന്നടുത്തോളം തിയറ്ററുകളില്‍ ഒറ്റയടിക്ക് പടമിറക്കി, ആ ഇരുപത്തിയഞ്ച് ദിവസങ്ങള്‍ മുതലാക്കുകയും ചെയ്യും."
ഏട്ടന്‍ :" പോരാത്തതിന് സാറ്റ്ലൈറ്റ് റൈറ്റ്സ് , വീഡിയോ റൈറ്റ്സ് പല പേരിലും അങ്ങിനെ പല വകയില്‍ അവന് കാശ് വേറെയും കിട്ടും . അവന്‍ ഹാപ്പി . ഞങ്ങള്‍ ഇന്നലേ ഹാപ്പി."

എ കെ : "അപ്പൊ നിങ്ങളുടെ സമീപകാലത്തിറങ്ങിയ എല്ലാ ചിത്രങ്ങളും ഹിറ്റാണോ ?"
ഇക്ക : "ഒവ്വ. അങ്ങനെയായിരുന്നേല്‍ ഞങ്ങള്‍ എവിടെയിരുന്നേനെ ഇപ്പോള്‍‍? ഹിറ്റല്ലാത്ത പടങ്ങളെ നിന്നപ്പോലുള്ള ഫ്രാഡ് മാധ്യമ പ്രവര്‍ത്തകരുടെ സഹായത്തോടെ ഗംഭീരം , തകര്‍ത്തു, എന്നൊക്കെ എഴുതിച്ച് ഞങ്ങള്‍ തടിയൂരും"
ഏട്ടന്‍ :"കള്ള്,പണം ,പിന്നെ അടുത്ത പടത്തിന്റെ കഥ ,തിരകഥ എഴുതാനുള്ള ഓഫര്‍, ഇതിലൊക്കെ വീഴാത്ത ഏതെങ്കിലും ചെറ്റ ഇന്ന് നിന്റെയൊക്കെ കൂട്ടത്തിലുണ്ടോ? പിന്നെ ഫിലിം ഫീല്‍ഡില്‍ ഞങ്ങളുടെ സ്വാധീനം കാരണം , അവിടുള്ള ഒരുത്തനും ഒന്നും മിണ്ടില്ല. മാത്രമല്ല എന്നെ വെച്ചു പടമെടുത്തു പൊട്ടിയ നിര്‍മ്മാതാവിന് നഷ്ടം നികത്താന്‍ ഇക്കയുടെ ഡേറ്റ് വേണം .തിരിച്ചും. അത് കൊണ്ട് അവന്‍മാരും പറയും പടം നഷ്ടം വരുത്തിയില്ല എന്ന് . അടുത്ത പടവും പൊട്ടിയാല്‍ പിന്നെയും ആദ്യത്തെ ആളുടെ അടുത്ത്‌ തിരിച്ച് വരാനുള്ളതല്ലേ അവന് . "

എ കെ : "ഇത്രയൊക്കെ കണക്കു കൂട്ടുന്ന നിങ്ങള്‍ക്ക് പക്ഷെ ചിലപ്പോള്‍ സ്വന്തം പടങ്ങള്‍ റിലീസ് ചെയ്യുമ്പോള്‍ പിഴക്കാറില്ലേ ? രണ്ടാളുടെയും പടങ്ങളുടെ റിലീസ് ഡേറ്റുകള്‍ തമ്മിലിടയാറുണ്ടല്ലോ? ഇതു രണ്ടു പേരുടേയും ചിത്രങ്ങള്‍ക്ക് ദോഷകരമല്ലേ? "
ഇക്ക :" ഇവനെ ആരെടാ പത്രപ്രവര്‍ത്തകനാക്കിയത്? എടാ , ഞങ്ങളുടെ പടങ്ങള്‍ ഒരേ സമയം റിലീസ് ചെയ്യുമ്പോള്‍ മെഗാ സുപ്പര്‍സ്റ്റാര്‍ വെര്‍സെസ് സൂപ്പര്‍ മെഗാസ്റ്റാര്‍, വമ്പന്മാര്‍ കൊമ്പുകോര്‍ക്കുന്നു , തിയറ്ററുകളില്‍ ഇനി മത്സരത്തിന്റെ നാളുകള്‍ എന്നൊക്കെ നിങ്ങള്‍ പത്രക്കാര്‍ തെണ്ടികള്‍ എഴുതും .നിങ്ങള്‍ അങ്ങിനെ എഴുതിയാലേ, ഞങ്ങള്‍ക്കും പടങ്ങള്‍ക്ക് വേണ്ട ഇമ്പാക്റ്റ് കിട്ടുകയുള്ളൂ"
ഏട്ടന്‍ : "പക്ഷേ , അടുത്തകാലത്തായി ഞങ്ങളുടെ പടങ്ങള്‍ ഒരേ ദിവസം തിയറ്ററുകളില്‍ എത്തിയാല്‍ ഏതെങ്കിലും ഒന്നിനോ, ചിലപ്പോള്‍ രണ്ടിനുമോ പണി കിട്ടുമെന്ന് ഞങ്ങള്‍ക്ക് നന്നായിട്ടറിയാം. അത് കൊണ്ട് ഒരാളുടെ പടമിറങ്ങി ചുരുങ്ങിയത് രണ്ടാഴ്ച്ചയെങ്കിലും കഴിഞ്ഞിട്ടേ അടുത്തയാളുടെ പടം പുറത്തിറങ്ങു"
ഇക്ക : "ദാ, ഇപ്പൊ തന്നെ എന്‍റെ 'ലവ് ഇന്‍ ആഫ്രിക്ക' ഇറങ്ങി. ഇവന്‍റെ 'റെഡ് കിളീസ്' അതിനൊപ്പം ഇറങ്ങും ,ഞങ്ങള്‍ തമ്മില്‍ മുട്ടന്‍ മത്സരം നടക്കും എന്ന് നീയൊക്കെ എഴുതിപ്പിടിപ്പിച്ചിട്ട് എന്തായി?"
ഏട്ടന്‍ :" ഇക്കയുടെ പടം രണ്ടാഴ്ച്ച ഓടി കിട്ടാവുന്നത്ര കളക്ഷന്‍ നേടിക്കഴിഞ്ഞിട്ടെ എന്‍റെ പടം പുറത്തിറങ്ങു. അടുത്ത തവണ തിരിച്ചും . അത് ഞങ്ങളുടെ സൌകര്യം പോലെ"

എ കെ : " അപ്പോള്‍ ഇതിന്റെ പേരില്‍ നിങ്ങളുടെ ഫാന്‍സ്‌ തമ്മിലെ ശത്രുത? കഴിഞ്ഞ തവണ ഇക്കയുടെ ഈഗിള്‍ പുളുസുവും , ഏട്ടന്റെ മാടന്‍ തമ്പിയും ഇറങ്ങിയപ്പോള്‍ നിങ്ങളുടെ ഫാന്‍സ്‌ തമ്മില്‍ ഉണ്ടായ പുകിലുകള്‍ ഓര്‍മ്മയില്ലേ?"
ഇക്ക :"അവന്മാര്‍ കിടന്ന് അടിക്കെട്ടെടാ . എന്നാലല്ലേ ഞങ്ങള്‍ക്ക് നാട്ടില്‍ ഒരു വിലയുള്ളൂ?"
ഏട്ടന്‍ : "അവന്‍മാരുടെ ഈ തമ്മില്‍ തല്ലല്ലേ സമീപകാലത്തായ് ഞങ്ങളുടെ കഞ്ഞി" .

എ കെ : "നിങ്ങള്‍ രണ്ടാളും സ്വയം, ഒരു പത്തു വര്‍ഷങ്ങള്‍ക്കപ്പുറം മലയാളത്തിലെ പ്രധാന അഭിനേതാക്കളായി തന്നെ കാണുന്നുണ്ടോ ?"
ഇക്ക : "അങ്ങിനെ കാണാനേ ഞങ്ങളും ഞങ്ങളുടെ ഫാന്‍സിനെപ്പോലെ മണ്ടന്മാരായിരിക്കണം. ഏറിയാല്‍ ഒരു അഞ്ചോ , ആറോ വര്‍ഷങ്ങള്‍ കൂടി ഇങ്ങിനെ ആളുകളെ പറ്റിച്ച് പടങ്ങള്‍ ഇറക്കണം. അതിന് ശേഷം രാഷ്ട്രീയത്തില്‍ ഇറങ്ങിയാല്‍ എന്താ എന്നാ ഞാന്‍ ആലോചിക്കുന്നത്."
ഏട്ടന്‍ : " അഞ്ചാറ് കൊല്ലത്തേക്ക്‌ എന്‍റെയും പരിപാടി ഇക്ക പറഞ്ഞത് തന്നെ. .അതിന് ശേഷം ഒക്കുമെങ്കില്‍ എന്‍റെ മകനെ അടുത്ത സൂപ്പര്‍സ്റ്റാര്‍ ആക്കിയ ശേഷം, ഞാന്‍ നിര്‍മ്മാതാവായി തുടരണം എന്ന് വിചാരിക്കുന്നു. എന്‍റെ 'റെഡ് കിളീസിനു' ശേഷം വരുന്ന ' അര്‍ജ്ജുന്‍ അലിയാസ് എ കെ റീലോഡഡ് ' എന്ന ചിത്രത്തില്‍ മകന്‍ ചെറുക്കനെ എന്‍റെ പിന്‍ഗാമി എന്ന നിലയില്‍ ഒരു സീനില്‍ അവതരിപ്പിക്കുന്നുണ്ട്. "

എ കെ : "നിങ്ങള്‍ എനിക്കനുവദിച്ച സമയം ഏതാണ്ട് തീരാറായി. അവസാനമായ് ,മലയാള സിനിമയില്‍ പുതുമുഖ നടന്മാരുടെയും , പുതിയ സാങ്കേതിക പ്രവര്‍ത്തകരടെയും കടന്ന് വരവിനെക്കുറിച്ച് നിങ്ങളുടെ രണ്ടാളുടെയും അഭിപ്രായം കൂടി വായനക്കാരോട് പങ്കുവെച്ചാല്‍ നന്നായിരുന്നു. "
ഇക്ക : "ഏത് പുതുമുഖം? ഒരുവിധപ്പെട്ടവന്റെയൊക്കെ പടത്തിന് മുന്‍പും പിന്പും ഞങ്ങളുടെ രണ്ടാളുടെയും പടങ്ങള്‍ ഇറക്കി ഞങ്ങള്‍ ഒതുക്കിയതാണല്ലോ?പിന്നെ വരുന്നത് ഞങ്ങളില്‍ ആരുടെയെങ്കിലും മക്കളാണെങ്കില്‍ കുഴപ്പമില്ല . ബാക്കിയുള്ളവന്മാര്‍ തത്കാലം ഞങ്ങളുടെ അനിയന്‍ വേഷങ്ങള്‍ ചെയ്‌താല്‍ മതി . "
ഏട്ടന്‍ : "പിന്നെ സാങ്കേതിക പ്രവര്‍ത്തകര്‍ ,അവര്‍ വന്നോട്ടെ. പക്ഷേ ഞങ്ങളെ രണ്ടാളെയും വെച്ച് മാത്രമെ അവന്‍മാര്‍ സിനിമകളെടുക്കാന്‍ പാടുള്ളു ."
ഇക്ക : "അതെ ,അല്ലെങ്കില്‍ തന്നെ ഇപ്പൊ കാണികള്‍ക്ക്‌ കുറേശ്ശെ വിവരം വെച്ച് തുടങ്ങിയോ എന്നൊരു സംശയമുണ്ട്‌. അതിനിടക്ക് വേണം ഇനി വല്ല കൊള്ളാവുന്ന പുതുമുഖ സംവിധായകനോ,തിരകഥകൃത്തോ കേറി ഏതെങ്കിലും പുതിയ തെണ്ടിയെ വെച്ച് പടമെടുത്ത് ഹിറ്റവാനും ,പ്രേക്ഷകര്‍ ഒറ്റയടിക്ക് ഞങ്ങളെ രണ്ടാളെയും വല്ല കടലിലോ കുളത്തിലോ കൊണ്ട് കളയാനും."
ഏട്ടന്‍ : "അത്രയ്ക്ക് ടെഷന്‍ ഒന്നും വേണ്ടിക്കാ. അഥവാ ഇനി അങ്ങിനെ കഴിവുള്ള സംവിധായകര്‍ വന്നാല്‍ ഇപ്പോളത്തെ സാഹചര്യത്തില്‍ നമ്മളില്‍ ആരെങ്കിലും ഒരു ഡേറ്റ് ഓഫര്‍ ചെയ്‌താല്‍ മൂക്കും കുത്തി നടന്നവന്‍ വരില്ലേ? അതോടെ തീരും അവന്‍റെ കുതിപ്പ്. "

എ കെ : "ഇത്രയും സമയം വായനക്കാര്‍ക്ക്‌ വേണ്ടി ചിലവഴിച്ച നിങ്ങള്‍ രണ്ടാള്‍ക്കും, വായനക്കരുടെയും, തമോഗര്‍ത്തത്തിന്റെയും, പ്രത്യേകമായി എന്‍റെയും നന്ദി അറിയിക്കുന്നു"
ഇക്ക : " നന്ദിയൊക്കെ വാക്കില്‍ മാത്രം പോര.ഞങ്ങളുടെ പടങ്ങള്‍ ഇറങ്ങുമ്പോളും വേണം. നീ ഇപ്പ പോയി എന്‍റെ 'ലവ് ഇന്‍ ആഫ്രിക്കയുടെ' ഒരു കലക്കന്‍ നിരൂപണം എഴുതി തമോഗര്‍ത്തത്തില്‍ കൊടുത്തോ. എന്നിട്ട് വന്ന് എന്‍റെ അടുത്ത പടത്തിന് തിരകഥ എഴുതിക്കോ."
ഏട്ടന്‍ : "റെഡ് കിളീസ് പുറത്തിറങ്ങുന്ന ദിവസം അതിന്റെയും ഒരു വെടിക്കെട്ട് നിരൂപണം കാച്ചിയിട്ട് നീ നേരെ എറണാകുളം ലെ മെരിഡിയനില്‍ വാ .ഒരു തണ്ണി പാര്‍ട്ടിയുണ്ട്. "

എ കെ : "ഹൊ ,കൊതിയാവുന്നു. നിരൂപണം ഞാന്‍ എപ്പോ എഴുതി എന്ന് ചോദിച്ചാല്‍ പോരെ.മാത്രമല്ല നിങ്ങളുടെ ഏതെങ്കിലും പടം മോശമാണെന്ന് പരസ്യമായി ആര് പറഞ്ഞാലും ഞാന്‍ ഇന്നു മുതല്‍ അവന്‍റെ തന്തക്കു വിളിക്കുകയും ചെയ്തോളാം"
ഏട്ടന്‍ :" ചെറുക്കന്‍ രക്ഷപ്പെടുന്ന ലക്ഷണമുണ്ട്. പക്ഷേ രക്ഷപെട്ട ശേഷം തിരിഞ്ഞു നിന്ന് തന്തക്ക് വിളിക്കരുത്, കേട്ടോടാ?"
എ കെ :"അതെന്താ ഏട്ടാ അങ്ങിനെ പറയുന്നത്?"
ഇക്ക: "ഞങ്ങളുടെ കൂടെ രണ്ടും,മൂന്നും പടം നിരത്തിയഭിനയിച്ച ചില പുതുമുഖ നായികമാരുടെ സ്വഭാവം കാണിക്കരുത് എന്നാ അവന്‍ ഉദ്ധേശിച്ചത്. പേരെടുക്കും വരെ ഇക്ക, ഏട്ടാ എന്നൊക്കെ വിളിച്ചു സുഖിപ്പിച്ച് നിന്നിട്ട് എങ്ങിനെയെങ്കിലും തമിഴിലോ ,തെലുങ്കിലോ ഒരു പടം ഒപ്പിക്കും. ആ പടം ഓടി ഡിമാന്റ് ആയിക്കഴിഞ്ഞാല്‍ പിന്നെ ഞങ്ങളെപ്പോലുള്ള കിഴവന്മാരുടെയോപ്പം അഭിനയിക്കില്ല എന്നാ അവളന്മാര്‍ പറയാറ്‌. "
എ കെ : " ഹെയ് ഞാന്‍ അങ്ങിനെ ചെയ്യുമോ?"
ഇക്ക : "ചെയ്യരുത് എന്നാ പറഞ്ഞത്"
ഏട്ടന്‍ : "എന്നാ നീ പോയി ഇക്കേടെ പടത്തിന്റെ നിരൂപണം എഴുത്. ഞങ്ങള്‍ക്ക് അടുത്ത രണ്ടു പടങ്ങളുടെ റിലീസ് ഡേറ്റുകള്‍ ആലോചിച്ച് തീരുമാനിക്കനുണ്ട്. "

10 comments:

Calvin H said...

""അല്ല ,അപ്പൊ അഭിനയത്തിന്റെ കാര്യത്തില്‍ നിങ്ങള്‍ തമ്മില്‍ മത്സരം ഇല്ലേ ?"
ഇക്ക : "അഭിനയമോ? എഴുന്നേറ്റു പോടാ അവിടുന്ന്,വൃത്തികേട്‌ പറയാതെ. ഞങ്ങള്‍ അങ്ങിനെയുള്ള തറ പരിപാടികള്‍ നിറുത്തിയിട്ട്‌ അഞ്ചാറ് കൊല്ലമായി "

nice :)

Anil said...

Superb, കിടിലന്‍

:)

Anonymous said...

Wow, really wonderful one. Expecting more interviews of these sorts...

Thanks a lot for your time

വീണ said...

നിങ്ങളെ തമാസിയാതെ നാട്ടുകാര്‍ ഒന്നുകില്‍ തല്ലികൊല്ലും അല്ലെങ്കില്‍ പിടിച്ചു വല്ല വിശുദ്ധനും ആക്കും.
സാമ്പത്തിക മാന്ദ്യം കരണമാണ്,അല്ലെങ്കില്‍ തിരഞ്ഞെടുക്കുന്ന വിഷയങ്ങളുടെ വൈവിധ്യത്തിനും , അവ കൊള്ളണ്ടിടത്ത് കൊള്ളുമ്പോഴും സരസമായി പറയുന്ന ഭാഷക്കും ഒരു ചോക്കലേറ്റ് എങ്കിലും മേടിച്ചു തന്നേനെ. :)

Anonymous said...

ബ്ലോഗ് പോലൊരു സ്വന്തന്ത്ര മാധ്യമത്തിലും നമ്മുടെ എഴുത്തുകാര്‍ ഒന്നൊഴിയാതെ ഇന്നും വിധേയന്‍ വേഷ കെട്ടാനുള്ള അവസരങ്ങള്‍ക്ക് ഉന്തും തള്ളുമാണ്. അതിനിടയില്‍ ഇങ്ങനെയും എഴുതാന്‍ ആളുണ്ട് എന്നറിഞ്ഞതില്‍ സന്തോഷിക്കുന്നു. തുടര്‍ന്നും ഇത്തരം നിര്‍ഭയമായ എഴുത്തുകള്‍ പ്രതീക്ഷിക്കുന്നു. ആശംസകള്‍

Aadityan said...

തകര്ത്തു . എന്നി ആകെയുള്ള സംശയം നിങ്ങള്‍ ആരുടെ കൈ കൊണ്ട തല്ലു കൊണ്ടു ചാകുന്നത് എന്ന് മാത്രം .:) പോസ്റ്റ് നന്നായി . അടുത്തത് ആരാണാവോ ?

Aadityan said...

nice post keep up the pase and style . (forgot to mark the track(

പ്രിയ ഉണ്ണികൃഷ്ണന്‍ said...

നല്ല പെട!

Unknown said...

Too good .
Cheers

Hrishy said...

Kidilan .......